هاتكلم
--------
فين الديمقراطية دى اللى بيها فرحانين
لما لسه فى قواضى بتتلفا للصحافيين
لغاية امتى الناس هتفضل ساكتة وكلامها فى همس
لان اللى بيعلى صوته بيروح ورا الشمس
بس انا
هاتكلم مش هاخبي..مش هافضل كاتم فقلبي
هاتكلم لو حتى كان واحد منهم قاعد جنبي
هاتكلم واقول احساسي..هاتكلم لو نقدي آسي
هاتكلم مع اني عارف اني هاتشد اساسي
هاتكلم لو حتى كانت دية آخر أنفاسي
لحد امتى الناس دي هتفضل قاعدة عالكراسي
لحد امتى الحزب الحاكم هيفضل على انفاسنا كاتم
الناس كلها عماله تطالب بس محدش منهم فاهم
اننا
عايزين تغيير لأن الوضع خطير
عايزين واحد عنده ضمير كفاية نصب وتزوير
بنتعصر زي اللمون في بلد مفيهاش قانون
الموضه اليومين دول ان الجاني يكون مجنون
انا خلاص نويت اتكلم
اسمعني وبلاش تبلم
صدقني وركز هاتتعلم
حاجات مهمة تفيدك
..
ازاي يبقى عندك صوت
ولو واقفين وراك بالسوط
اتكلم وماتخافش الموت
يللا حط ايدي فإيدك
هاتكلم عن الداخلية لما تفشل فاي قضية
هادي مثل بسيط زي ماحصل فالمجزرة البشرية
ومتعرفش المرتكب مين.. فاكرنا مغفلآين
هو فظرف يومين تلفقها لواحد من المجانين
لأ وبقى فيه سفاح اطفال .. ده غير كمان اللي اتقال
عن سرقة ونشل ونهب وقتل اصلاحهم ده محال
في الاعلام الفن رسالة .. بس الفلام مليانة سفالة
كله أي كلام في الهايف وانا مش شايف حاجه
شغاله
حوادث كتيرة بتحصل وياترى مين الغلطان
قالوا عامل التحويلة فالقطر وفالعبارة قالوا القبطان
وياريتها بتخصل مرة ومن غلطهم بيتعلموا
انما دي بتحصل تاني وبرضوا لسة بيتكلموا
لحد امتى ياناس هيفضل في اختلاس بيمشوا ورا الوسواس خايفين من الافلاس
واللي يصيح ينداس هوه ده الاساس خلاص معدش فيه احساس
انا خلاص نويت اتكلم
اسمعني وبلاش تبلم
صدقني وركز هاتتعلم
حاجات مهمة تفيدك
..
ازاي يبقى عندك صوت
ولو واقفين وراك بالسوط
اتكلم وماتخافش الموت
يللا حط ايدي فإيدك
انا مش بتكلم عشان نكرها..عايزين بإدينا نعمرها
بلاش نتكلم عن تاريخها وشمسها ويا قمرها
مش ممكن يئذيك حد.. لوهتشتغل بجد
اعمل اللي عليك بضمير وميهمكش لو تتشد
لو كل واحد خايف.. شغال عند ظالم جايف
يفتكر ان ربنا متطلع على عمله وشايف
مش بننقد وخلاص..احنا بنقول لكل الناس
ان الحل مننا فالأول وبعديها هنشوف الخلاص
هاتكلم عن الحل اللي بنطالب بيه..عايزين القرآن نتمسك بيه
عايزين نطبق الشريعة.. ماهي دي الزريعة
اللي بيها نقدر نوصل.. صدقني والله حيحصل
ماهي دايرة وبتدور.. واحنا جه علينا الدور
نحكم العالم بيه والاسلام يكون منصور
لازم نتعلم من أخطائنا على مر العصور
المشكله دي مش هتتحل في شهور
بلاش نحسسهم انهم الصقر واحنا العصفور
لو كان لك دهر هات عبارات وارميها فالبحر
الرشاوي والوسايط بقت عيني عينك فعز الظهر
اللي معاه فلوس .. يقدر على أي حد يدوس
بعدها يقول تصريحات كتيرة من اللي بتهدي النفوس
دي اسوء فتره في تاريخ مصر
التعديلات معموله بشكل خبيث
متظبطه عشان التوريث
7 comments:
البلد ماتت واحنا موتنا يا ادم خلاص
مصاء الخير بالصبح
سلامون عليك
قبل مانسى
يفتكر ان ربنا- متطلع- على عمله وشايف
مضطلع
...................
بالنسبة للحل اعتقد ان حضراتكوا قلتوا اللي فيها
بس دية مش اسوء عصور مصر علي فكرة
كان اخوي - قرأ شوية في تاريخ مصر- والله اعلم
قالي ان كان فية فترة الناس مكانتش لاقية تاكل
وكان مفيش كلام ولا اي حيوانات أليفة في الطرقات عشان الناس بتصطادها
انا مبتمناش نوصل لهذه المرحلة طبعاً
ولا بقو اننا في نعمة ولا أي بطيخ
بس احنا احسن من زمان
واعتقد ان الناس الكويسة بتزيد
بس للأسف الأسيف الناس المش كويسة مبقاش عندها حياء تستخبي
بقت تعمل الحاجات المش كويسة علناً
عشان كدة حسينا بمدى القهر و الظلم و القرف
علي فكرة بتاع العبارة خد براءة :D
يلا خير خير
دمتم سالمين
سلام عليكم
السلام عليكم ورحمة الله وبركاته
ان الله لا يغير قوم حتى يغيرو ما بأنفسهم
أكيد فى أمل لانو ربنا يمهل ولا يهمل
انا بردو عندى امل
وفعلا لازم كل واحد يبدأ بنفسو ويستغل الفترة دى ويستعد لرمضان بقلبو وعقلو وكل جوارحو
وندعى ربنا انو يختارنا للمهمه دى
اذا احب الله العبد اقتناه
يارب يجعلنا منهم
أختكم توكا
ان الله لا يغير ما بقوم حتى يغيوا ما بانفسهم
عشان كدة احنا لازم نتغير الاول بعدين نبدا نغير فى اللى حولينا وتبدى الدايرة توسع
appy
------
لا يأس مع الحياة..احنا لسه عايشين
نعكشة
----
مصاء دي بتاعة الراجل بتاع عالم البحار
تؤتؤ هي زي مانا كاتبها متطلع
انا قريت فعلا الفترة السيئة دي في مصر
الواحد كان يبعت للدكتور يقوله في ناس تعبانة ..وبعد كده ياكلوا الدكتور...حصل حقيقي مش هزار..خافي
على نفسك بقة
والحكم بتاع العبارة كان ساعة ماتش الاهلى والهيصة ومحدش عرفه غير القليل
خير ان شاء الله
نورتي
توووكا
-------
كويس انك متفائلة اهو...ابعدي بقة عن موود الكئابة
وخصوصا اننا داخلين على رمضان..يعني نزرع من دلوقتي عشان نحصد في رمضان
نورتي
ToTo
-----
صومعة
ده انت بتقول كلام حلو اهو...اومال سهتان ليه ياض لما بشوفك..اللي يشوفك بتتكلم يفتكرك عالم..اخخخخ
وانت اخرك عالم الانترنت اللى فالسابعة
مليش دعوة مضطلع برضو
مُتَطَلِع ؟؟؟؟؟
انها مُضْطَلِع
عامتاً مليش دعوة
............
قشطة هبقي ميته في سبيل مهنتي
مش حاجة تخوف قوي كدة
عرفته من المدونات
انا لوا بتفرجع علي الماتش
ولا بتفرج علي التلفوز العادي
آخري mbc2 , mbc3 , mbc 4
و ساعات روتانا سينما بس افلامها كلها معوقة
دة نور اللمبة
دمت سالم
سلامٌ عليك
Post a Comment